Үндэсний геологийн албаны санаачилгаар “Дагалдах ашигт малтмалын судалгаа, нөөцийн тооцоолол”, “Үүсмэл ордын геологийн судалгаа, нөөцийн тооцоолол” аргачилсан зөвлөмжүүдийг боловсруулж, 2025 оны 02 дугаар сарын 04-ний өдрийн Эрдэс баялгийн мэргэжлийн зөвлөлийн “Ашигт малтмалын хайгуулын асуудал хэлэлцэх” салбар зөвлөлийн хуралдаанаар хэлэлцэн хүлээн авлаа.
Дээрх 2 аргачилсан зөвлөмжийг Аж үйлдвэр, эрдэс баялгийн яам (хуучнаар Уул уурхай, хүнд үйлдвэрийн яам)-аас зохион байгуулж, ХБНГУ-ын Гео шинжлэх ухаан, байгалийн нөөцийн холбооны хүрээлэн (BGR)-гийн дэмжлэгтэйгээр ШУТИС-ийн Геологи, уул уурхайн сургуулийн харьяа Эрдэс баялгийн судалгаа, гео-мэдээлэл, сургалтын төвд боловсруулсан байна.
Уг аргачилсан зөвлөмжүүдийг байгууллагын харьяалал, эзэмших эрхийн хэлбэрийг харгалзахгүйгээр газрын хэвлийн ашиглалтын хүрээнд үйл ажиллагаа явуулагч аж ахуйн нэгж, үйлдвэрийн газруудын ажилтнуудад зориулав. Геологи хайгуулын мэдээллийг олж авах, түүний чанар болон бүрэн байдал нь цаашдын геологи-хайгуулын ажил явуулах шийдвэрийг гаргахад, эрэл хайгуул хийгдсэн ордуудын нөөцийг үйлдвэрлэлийн эргэлтэд оруулахад, мөн ашигт малтмалын олборлолт, боловсруулалт хийж байгаа үйлдвэрүүдэд шинэчлэл хийхэд, шинэ үйлдвэрүүдийг барьж байгуулахад хэрэглэгдэх боломжтой. Аргачилсан зөвлөмжүүдийн хэлэлцүүлгийн явцад саналаа ирүүлсэн геологич, судлаачид, аж ахуйн нэгж байгууллага, үйлдвэрлэгчид болон амжилттай гүйцэтгэсэн баг, редактор, шинжээчид, мөн ЭБМЗ-д талархал илэрхийлье.
